ΗΛΙΑΧΤΙΔΑ Μαρία Σταμάτογλου 

Προχθὲς μὲν ἄνθρωποί τινες, ὅπλα ἔχοντες καὶ Ῥωσσικὰ σημεῖα σείοντες, εἰς τὴν τῆς Κριμέας Βουλὴν εἰσελθόντες τοὺς ἄρχοντας βίᾳ ἐξέβαλον, χθὲς δὲ τῇ Παρασκευῇ στρατιῶταί τινες εἰς τοὺς δύο ἀερολιμένας τῆς Κριμέας εἰσέβαλον (ἐν τῇ Σεβαστουπόλει καὶ ἐν τῇ Συμφερουπόλει), νῦν δὲ οὗτοι οἱ ἀερολιμένες ὑπὸ αὐτῶν κατέχονται. πρῶτον μὲν οὐ σαφὲς ἦν ὁπόθεν οὗτοι οἱ στρατιῶται ἀφίκοιντο, ἔπειτα δὲ δῆλον ἐγένετο ὅτι Ῥῶσσοι ἦσαν, Ῥωσσικὰ γὰρ σημεῖα φέροντες ἐτύγχανον, ὡς οἱ τῇ προτεραίᾳ εἰς τὴν Βουλὴν εἰσελθόντες.

νεωστί, ὡς πάντες ἴσμεν, οἱ τῆς Οὐκραίνας πολῖται, ἐν ταῖς ἁγυιαῖς μαχόμενοι, τὸν Ἰανουκόβιζ ἐκ τῆς ἀρχῆς ἐξέβαλον ἅτε τὴν χώραν ἐν τοῖς τοῦ Κρέμλιν γόνασι θεῖναι βουλόμενον· ὅμως δὲ τοὺς πολίτας οὐκ ἔλαθεν τοῦτο πειρώμενος, οἱ δέ, τὴν Εὐρωπαικὴν δημοκρατίαν προαιρούμενοι, τῷ Ἰανουκόβιζ ἀνέστησαν καὶ ἠνάγκασαν ἐκ τῆς χώρας ἐκφυγεῖν (εἰς τὴν Ῥωσσίαν, πῶς γὰρ οὔ;).

ὁ Ποῦτιν, τοῦτο χαλεπῶς φέρων καὶ αἰσθόμενος τὴν Οὐκραίναν ἐν τῇ Ῥωσσικῇ σφαίρᾳ οὐκ ἐσομένην, πειρᾷ νῦν τήν γε Κριμέαν κατέχειν, αὐτόνομον μέρος τῆς Οὐκραίνης οὖσαν, ἐν ᾧ οἱ πλεῖστοι τῶν ἐνοικούντων ἐκ Ῥωσσικῆς γενέσεως ἥκουσιν· καὶ δὴ καὶ ἐν τῇ Σεβαστοπόλει Ῥωσσικὴ ναυτικὴ ἀφορμὴ κεῖται (ἡ Ῥωσσία καὶ ἡ Οὐκραίνα συνθήκην ἐποιήσαντο ἤδη πάλαι περὶ ταύτης τῆς ἀφορμῆς)· τούτων δὲ γενομένων, εἶπεν μὲν χθὲς ὁ Ποῦτιν ὅτι οὐδὲν εἰδείη περὶ τούτων τῶν στρατιωτῶν τήν τε Βουλὴν καὶ τοὺς ἀερολιμένας κατασχόντων, τήμερον δὲ τῷ Σαββάτῳ ἑξακισχίλιοι Ῥωσσικοὶ στρατιῶται εἰς τὴν Κριμέαν ἀπροσδοκήτως ἀφιγμένοι εἰσίν· κατὰ μὲν τὴν συνθήκην ἔξεστι τῇ Ῥωσσίᾳ ἐνίους στρατιώτας ἐν τῇ Κριμέᾳ ἔχειν, ὅμως δὲ οὗτοι οἱ ἑξακισχίλιοι ἔξω τῆς συνθήκης εἰσίν.

                                                           αναμετάδοση από το http://www.akwn.net/

Ὁ πρόεδρος Βίκτωρ Ἰανουκόβιζ πυροβολεῖν κελεύει

Τήμερον τῇ Πέμπτῃ πρωὶ αὖθις οἱ φύλακες τοῖς ἀνθισταμένοις ἐπέθεντο ἐν τῷ τοῦ Κίεβ κέντρῳ. οὐκ ἀκριβῶς ἴσμεν ὁπόσοι ἄνθρωποι ἀπέθανον (λέγεται ὅτι πλείονες ἢ ἑκατὸν) ἐξ οὗ ἡ μάχη ἤρξατο ἐν τῇ τῆς Αὐτονομίας Ἀγορᾷ (καλουμένῃ καὶ “Τὸ Μαιδᾶν“). τῇ μὲν Τετάρτῃ, τοῦ τῆς Οὐκραίνης προέδρου Βίκτωρ Ἰανουκόβιζ τοὺς φύλακας κελεύσαντος ἐπὶ τοὺς διαδηλωτὰς πυροβολεῖν, ἀπέθανον εἴκοσι καὶ ὀκτὼ πολῖται ὑπὸ τῶν φυλάκων, τήμερον δὲ τῶν φυλάκων αὖθις τοῖς πολίταις ἐπιθεμένων ἔτι πλείους ἀπέθανον, ἡ δὲ ἅμιλλα ἔτι καὶ νῦν νυκτὸς διατελεῖ. νεωστὶ δὲ εἶπεν ὁ τῆς ἀρχῆς φερέφωνος ὅτι οἱ ἀνθιστάμενοι ἑξήκοντα φύλακας ἐγκυκλώσειαν καὶ κατέχοιεν.

διὰ τί τοῦτο συμβαίνει; ἡ ἀπόκρισις σαφής ἐστιν· ὁ μὲν πρόεδρος Β. Ἰανουκόβιζ πειρᾷ τῇ Ῥωσσίᾳ συνθήκας ποιεῖσθαι, οἱ δὲ πολῖται προαιροῦνται τῇ Εὐρωπαικῇ Ἑνώσει, τοῖς γὰρ πολίταις ἡ Ῥωσσία δικτατωρείαν σημαίνει, ἡ δὲ Εὐρωπαικὴ Ἕνωσις δημοκρατίαν. οὐδαμῶς βουλόμενοι αὖθις δικτατωρείαν παθεῖν οἱ πολῖται εἰς τὸ Μαιδᾶν συναθροισάμενοι ἐκεῖ ἔμενον ἕως ὁ Β. Ἰανουκόβιζ τοὺς φύλακας πέμψας ἐκέλευσεν τοὺς ἀνθισταμένους βίᾳ ἐξελαύνειν· τούτου δὲ γενομένου, τήμερον τῆς ἑσπέρας ὁ Β. Ἰανουκόβιζ τοῖς τῶν Ἐξωτερικῶν Ὑπουργῶν τῆς τε Γερμανίας καὶ τῆς Γαλατίας καὶ τῆς Πολωνίας ὑπουργοῖς συνῆλθεν, οὗτοι γὰρ περὶ τοῦ φόνου ἀκούσαντες ὡς τάχιστα πρὸς τὸ Κίεβ ἐπορεύθησαν.

ἡ Ε. Ε. ζημίας τινὰς τῇ Οὐκρανίᾳ ἐπιθεῖναι βούλεται, τὸν δὲ Β. Ἰανουκόβιζ ἐποτρύνει τοὺς φύλακας ἐκ τοῦ Μαιδᾶν ἐξαγαγεῖν, ὅμως δὲ πάντες ἴσμεν τοῦτο τὸ σύστημα οὐδέποτε οὐδὲν οὐδαμοῦ οὐδαμῶς κτησάμενον, οἱ μὲν γὰρ ἄρχοντες πρὸς τὰς ζημίας καταγελῶσιν, οἱ δὲ πολῖται τυγχάνουσιν ὄντες οἱ τὰς ζημίας τῷ ὄντι δεχόμενοι καὶ πάσχοντες.

  ἡ δὲ Ἰούλια Τιμοσιένκω ἔτι ἐν τῷ δεσμωτηρίῳ κεῖται.

                                                        αναδημοσίευση από το http://www.akwn.net/

 

Ἀποθνῄσκει ὁ ἄνθρωπος ὃς τῷ τοῦ Ἀπαρταῖδ συστήματι τέλος ἐπέθηκεν.

Ὁ Νέλσων Μανδέλα, ὁ ἄνθρωπος ὃς εἴκοσι καὶ ἑπτὰ ἔτη ἐν τῷ δεσμωτηρίῳ ἔκειτο καὶ πρόεδρος τῆς Νοτίας Ἀφρικῆς ἐγένετο, ἀπέθανεν ἐνενήκοντα καὶ πέντε ἔτη γεγονώς.Πάντες ἴσμεν ὁποῖον πολιτικὸν σύστημα ἐν τῇ Νοτίᾳ Ἀφρικῇ ἦν τοῖς πολίταις· τὸ σύστημα Ἀπαρταῖδ καλούμενον, κατὰ ὃ οἱ λευκοὶ πολῖται τῶν ἐγχρώμων πολιτῶν ἐκράτουν. ὁ μὲν Μανδέλα, τοῦτο μεταβάλλειν ἐν νῷ ἔχων, εἰς τὸ Ἀφρικανικὸν Ἐθνικὸν Κογγρέσον (ANC) τῷ ἔτει 1944 (εἴκοσι καὶ ἓξ ἔτη γεγονὼς) εἰσέβη, πολλὰ δὲ ἔτη ἐπὶ τὸ Ἀπαρτεῖδ μαχεσάμενος κατελήφθη τῷ ἔτει 1962, καταδικασθεὶς δὲ πρὸς τὸ ἐν τῇ Ῥόββην Νέσῳ δεσμωτήριον ἐπέμφθη. τότε δὲ ἐν τούτῳ τῷ δεσμωτηρίῳ κείμενος καὶ ἔνδοξος γενόμενος ἐπικουρήσεις μὲν πολλὰς ἀπὸ πολλῶν χωρῶν ἐδέχετο, σύμβολον δὲ ἐγένετο.εἴκοσι καὶ ἑπτὰ ἔτη ἐν τῷ δεσμωτηρίῳ μείνας, ὁ Μανδέλα τέλος μὲν ὑπὸ τοῦ προέδρου δε Κλὲρκ ἠλευθερώθη, τότε δὲ τὴν ἑαυτοῦ βουλὴν τῇ οἰκουμένῃ ἐπήγγειλεν· οὐδεμίαν τιμωρίαν, διαλλαγὴν δέ. τῷ μὲν ἔτει 1994 ἐν ταῖς ἀρχαιρεσίαις πρόεδρος τῆς Νοτίας Ἀφρικῆς ἐγένετο, ἐν δὲ τῇ τῆς διαλλαγῆς πολιτικῇ πράξει ἔμενεν.ὁ Μανδέλα τρὶς ἔγημεν, τῆς δὲ πολιτικῆς πράξεως τῷ ἔτει 1999 ἐξέστη. ἀπὸ τοῦ ἔτους 1999 μέχρι τοῦ 2004 περὶ φιλανθρωπικῶν πράξεων εἰργάζετο, ἔπειτα δὲ τῷ 2004 ἀσθενέστατος γενόμενος καὶ νοσῶν πάσης πράξεως τὸ τελευταῖον ἐξέστη.

                                                                     αναδημοσίευση από το http://www.akwn.net/